അടുത്തിടെ കണ്ടതില്‍ ഏറ്റവും മികച്ച ട്രെയിലര്‍ ലൈക്ക നിര്‍മിച്ച ആ തമിഴ് ചിത്രത്തിന്റേത്: പൃഥ്വിരാജ്

തമിഴിലെ പ്രമുഖ നിർമാണ കമ്പനിയായ ലൈക്ക പ്രൊഡക്ഷൻസ് ആദ്യമായി മലയാളത്തിൽ നിർമിക്കുന്ന ചിത്രമാണ് എമ്പുരാൻ. പൃഥ്വിരാജിന്‍റെ സംവിധാനത്തിലൊരുങ്ങുന്ന ഈ ചിത്രത്തിന്റെ നിർമാണ സമയത്ത് തന്നെ ലൈക്ക മറ്റൊരു ബിഗ് ബജറ്റ് ചിത്രം കൂടെ നിർമിക്കുന്നുണ്ടായിരുന്നു. അജിത് നായകനാകുന്ന വിടാമുയർച്ചി. രണ്ട് സിനിമകളും പ്രേക്ഷകര്‍ ഒരുപോലെ സ്വീകരിക്കുമെന്ന് തനിക്ക് ഉറപ്പുണ്ടെന്ന് പൃഥ്വിരാജ് പറഞ്ഞു. എമ്പുരാൻ ചിത്രത്തിന്റെ ട്രെയ്ലർ ലോഞ്ചിൽ സംസാരിക്കവെയായിരുന്നു പ്രതികരണം.

‘ആശീര്‍വാദിനൊപ്പം ഈ സിനിമയുടെ നിര്‍മാണത്തില്‍ പങ്കാളികളാകുന്നത് ലൈക്ക പ്രൊഡക്ഷന്‍സാണ്. ലൈക്കയുടെ ആദ്യത്തെ മലയാള സിനിമയാണ്. ബിഗ് ബജറ്റ് സിനിമകള്‍ നിര്‍മിച്ച് ഒരുപാട് എക്‌സ്പീരിയന്‍സ് ഉള്ളവരാണ് അവര്‍. എമ്പുരാനൊപ്പം ലൈക്ക പ്രൊഡക്ഷന്‍സ് മറ്റൊരു ബിഗ് ബജറ്റ് സിനിമയും നിര്‍മിച്ചിരുന്നു. അജിത് സാറിന്റെ വിടാമുയര്‍ച്ചിയാണ് ആ സിനിമ.

ചിത്രത്തിന്റെ സംവിധായകന്‍ മഗിഴ് തിരുമേനിയും ഇന്ന് ഈ ചടങ്ങിന് എത്തിയിട്ടുണ്ട്. കഴിഞ്ഞ ദിവസം ആ സിനിമയുടെ ട്രെയ്‌ലര്‍ പുറത്തുവിട്ടിരുന്നു. ഈയടുത്ത് ഞാന്‍ കണ്ടതില്‍ വെച്ച് ഏറ്റവും മികച്ച ട്രെയ്‌ലര്‍ വിടാമുയര്‍ച്ചിയുടേതാണ്. മഗിഴ് തിരുമേനിയെപ്പോലെ ആ സിനിമ വലിയ വിജയമാകണമെന്ന് ഞാനും ആഗ്രഹിക്കുന്നുണ്ട്. സിനിമ ഫെബ്രുവരി ആറിന് തിയേറ്ററുകളിലെത്തും. എമ്പുരാനും വിടാമുയര്‍ച്ചിയും പ്രേക്ഷകര്‍ ഏറ്റെടുക്കുമെന്ന് എനിക്ക് നല്ല ഉറപ്പുണ്ട്,’ പൃഥ്വിരാജ് സുകുമാരന്‍ പറഞ്ഞു.

2025 മാർച്ച് 27 ന് ലോകമെമ്പാടുമുള്ള തിയേറ്ററുകളിൽ 'എമ്പുരാൻ' എത്തും. 'എമ്പുരാൻ' ലൂസിഫറിന്റെ പ്രീക്വലും സീക്വലുമാണെന്നാണ് പുറത്തുവരുന്ന റിപ്പോർട്ടുകൾ. സ്റ്റീഫൻ നെടുമ്പള്ളിയെന്ന അബ്രാം ഖുറേഷിയുടെ പഴയ ജീവിതവും പുതിയ കാലഘട്ടവും ചിത്രത്തിൽ കാണിച്ചു തരുമെന്നും വാർത്തകളുണ്ട്. ആദ്യ ഭാഗത്തിലെ അഭിനേതാക്കളായ മഞ്ജു വാര്യർ, ടൊവിനോ തോമസ്, സാനിയ അയ്യപ്പൻ, സായ് കുമാർ, ഇന്ദ്രജിത് സുകുമാരൻ, ബൈജു എന്നിവർക്കൊപ്പം സുരാജ് വെഞ്ഞാറമൂട്, ഷൈൻ ടോം ചാക്കോ, ഷറഫുദ്ദീൻ, അർജുൻ ദാസ് എന്നിങ്ങനെ പുതിയ താരങ്ങളും ചിത്രത്തിലുണ്ട്.

Content Highlights: Prithviraj says the best trailer he recently seen in Tamil movie vidaamuyarchi